Fuglerommet – Bjørg L. Strømme

I sommar frå 22. juni til 10. august er det kunstnar Bjørg L. Strømme som stiller ut på Skredhaugen.

Ho er spesielt oppteken av omgjevnadene rundt seg, av natur og fugleliv, og av kultur og arkitektur i gamle historiske bygningar.

Utstillinga på Skredhaugen har tittelen Fuglerommet.

Utstillinga er open når Venelaget til Skredhaugen har arrangement, eller etter avtale.

Om kunstnaren

Bjørg er utdanna lærar i kunst. Ho har hovudvekt på tekstil, design og funksjon. I til saman 33 år har ho undervist i kunstfag i grunnskulen, vidaregåande skule og vaksenopplæring. Teikning og måling har følgt henne heile livet, og då ho gjekk av med pensjon for 18 år sidan, byrja ho intensivt med akvarellmåling. Ho byrja med akrylmåling for 8 år sidan.
Bjørg har hatt rundt 30 separatutstillingar, og har deltatt på nesten like mange fellesutstillingar rundt om i Noreg. I tillegg har ho undervist i akvarell og akryl.

Bjørg har motteke kulturstipend og er innkjøpt av fleire norske kommunar. For sin kulturinnsats i heimkommunen Fitjar fekk ho kulturprisen i 2021, saman med ektemannen Karvel.
I 2007 og 2024 deltok ho på Ljosanott på ISLAND.